वडूजच्या विकासासाठी कोट्यवधींचा निधी; सहा महिन्यांत महत्त्वाची विकासकामे मार्गी – नगराध्यक्ष स्वप्नाली गोडसे

वडूज वार्ताहर :
राज्याचे ग्रामविकास व पंचायत राज्यमंत्री जयकुमार गोरे यांच्या मार्गदर्शनाखाली वडूज शहराच्या सर्वांगीण विकासासाठी कोट्यवधी रुपयांचा निधी उपलब्ध करून विविध विकासकामे मार्गी लावण्यात यश आल्याचे प्रतिपादन वडूज नगरपंचायतीच्या नगराध्यक्ष स्वप्नाली गोडसे यांनी केले.

नगराध्यक्ष पदाचा सहा महिन्यांचा कार्यकाल पूर्ण झाल्यानंतर आयोजित करण्यात आलेल्या कार्यक्रमात त्या बोलत होत्या. यावेळी भाजप तालुकाध्यक्ष अनिल माळी, सोमनाथ जाधव, अभय देशमुख, तानाजी वायदंडे, ओंकार चव्हाण, गणेश गोडसे, श्रीकांत काळे, मनोज कुंभार, स्वीकृत नगरसेवक सुधीर गोडसे तसेच भाजप युवा मोर्चाचे अध्यक्ष अक्षय थोरवे यांच्यासह अनेक मान्यवर उपस्थित होते.

स्वप्नाली गोडसे म्हणाल्या, “मंत्री जयकुमार गोरे यांनी माझ्यावर विश्वास ठेवून नगराध्यक्ष पदाची जबाबदारी सोपविली. नगरसेवक, पदाधिकारी आणि प्रशासनाच्या सहकार्यामुळे अल्प कालावधीत अनेक महत्त्वाची विकासकामे मार्गी लावता आली.”

त्यांनी सांगितले की, जिल्हा नियोजन समितीमार्फत वडूज शहरासाठी ३ कोटी ७५ लाख रुपयांचा निधी प्राप्त झाला असून त्यातून विविध प्रभागांमध्ये रस्ते, गटारे आणि पथदिव्यांची कामे सुरू आहेत. तसेच वैशिष्ट्यपूर्ण योजनेअंतर्गत ४ कोटी १० लाख रुपयांचा निधी मंजूर झाला आहे. या निधीतून नमो गार्डनसाठी १ कोटी रुपये, हुतात्मा स्मारक दुरुस्तीसाठी ५० लाख रुपये, प्रभाग क्रमांक १ मधील उद्यानासाठी ७५ लाख रुपये, प्रभाग क्रमांक १४ मधील व्हॉलीबॉल कोर्टासाठी ५० लाख रुपये, नगरपंचायत हद्दीत सुसज्ज सार्वजनिक स्वच्छतागृहासाठी २५ लाख रुपये तसेच येरळा नदीच्या सुशोभीकरण व स्वच्छतेसाठी २५ लाख रुपयांची तरतूद करण्यात आली आहे.

याशिवाय वडूज नगरपंचायतीच्या नवीन प्रशासकीय इमारतीसाठी ६ कोटी ५० लाख रुपयांचा निधी मंजूर करण्यात आला असून त्यासंदर्भातील प्रस्ताव प्रशासकीय मान्यतेसाठी सादर करण्यात आला आहे. आचारसंहिता संपल्यानंतर या इमारतीच्या कामास सुरुवात होणार असल्याचे त्यांनी स्पष्ट केले.

वडूज नगरपंचायतीचा विकास आराखडा तयार करण्याचे कामही प्रगतिपथावर असून त्यासाठी आतापर्यंत १ कोटी १२ लाख रुपयांचा निधी मंजूर करण्यात आल्याची माहिती त्यांनी दिली.

मंत्री जयकुमार गोरे यांनी सहा महिन्यांसाठी नगराध्यक्ष पदाची जबाबदारी दिली होती. दिलेला कार्यकाल पूर्ण झाल्याने त्यांना दिलेल्या शब्दाप्रमाणे आपण नगराध्यक्ष पदाचा राजीनामा देणार असल्याचे स्वप्नाली गोडसे यांनी जाहीर केले. भविष्यात पुन्हा संधी मिळाल्यास जनतेच्या सेवेसाठी अधिक जोमाने कार्य करणार असल्याची ग्वाहीही त्यांनी यावेळी दिली.

कार्यक्रमाचे स्वागत व प्रास्ताविक प्रसाद जगदाळे यांनी केले, तर आभार प्रदर्शनही त्यांनीच मानले.हेडलाईन पर्याय :

• वडूजच्या विकासासाठी कोट्यवधींचा निधी; सहा महिन्यांत अनेक कामे मार्गी

•नगराध्यक्ष स्वप्नाली गोडसे यांचा कार्यकाळ पूर्ण; विकासकामांचा घेतला आढावा

• जयकुमार गोरे यांच्या मार्गदर्शनाखाली वडूज शहराच्या विकासाला गती