म्हसवड येथील नगरवाचनालयात राजमाता अहिल्यादेवी होळकर यांची ३०१ वी जयंती उत्साहात साजरी

म्हसवड येथील नगरवाचनालयात राजमाता अहिल्यादेवी होळकर यांची ३०१ वी जयंती उत्साहात साजरी

म्हसवड वृत्तसेवा :
भारतीय इतिहासातील आदर्श लोककल्याणकारी राज्यकर्त्या, न्यायप्रिय आणि प्रजाहितदक्ष शासक म्हणून ओळखल्या जाणाऱ्या पुण्यश्लोक राजमाता अहिल्यादेवी होळकर यांच्या ३०१ व्या जयंतीनिमित्त म्हसवड येथील मोफत नगरवाचनालयात अभिवादनाचा कार्यक्रम उत्साहपूर्ण वातावरणात संपन्न झाला.

कार्यक्रमाच्या प्रारंभी म्हसवड नगरपरिषदेचे आरोग्य व स्वच्छता सभापती विजय बनगर यांच्या हस्ते राजमाता अहिल्यादेवी होळकर यांच्या प्रतिमेस पुष्पहार अर्पण करून अभिवादन करण्यात आले. यावेळी उपस्थित मान्यवरांनी अहिल्यादेवी होळकर यांच्या कार्याचा गौरव करत त्यांच्या लोकाभिमुख प्रशासन, सामाजिक बांधिलकी आणि स्त्रीशक्तीच्या प्रतीक म्हणून असलेल्या योगदानाचा गौरवपूर्ण उल्लेख केला.

या प्रसंगी म्हसवड नगरपरिषदेचे माजी नगराध्यक्ष तथा अहिंसा पतसंस्थेचे संस्थापक चेअरमन नितीनभाई दोशी यांनी अहिल्यादेवींच्या कार्याचा आदर्श समाजाने घेण्याची गरज व्यक्त केली. त्यांच्या कारकीर्दीत धर्म, समाज आणि विकास यांचा सुंदर समन्वय साधला गेला होता, असे त्यांनी सांगितले.

कार्यक्रमास नगरसेवक महावीर विरकर, मासळवाडीचे नगरसेवक डॉ. सतीश मासाळ, ग्रंथपाल सौ. सविता राऊत, सुनील राऊत, शिवाजी शिर्के, बन्सीलाल सराटे तसेच वाचनालयाचे अनेक वाचक, नागरिक आणि ग्रामस्थ उपस्थित होते.

उपस्थितांनी राजमाता अहिल्यादेवी होळकर यांच्या कार्याला अभिवादन करत त्यांच्या विचारांचे आजच्या पिढीने अनुकरण करावे, असे मत व्यक्त केले. कार्यक्रमाचे वातावरण प्रेरणादायी व उत्साहपूर्ण होते. जयंतीनिमित्त वाचनालय परिसरात राजमाता अहिल्यादेवी होळकर यांच्या जीवनकार्याविषयी माहिती देण्यात आली.

राजमाता अहिल्यादेवी होळकर यांच्या जयंतीनिमित्त आयोजित या कार्यक्रमामुळे उपस्थितांना त्यांच्या महान कार्याची आठवण झाली असून समाजसेवा, न्यायप्रियता आणि लोककल्याणाच्या मूल्यांचा संदेश देण्यात आला.