इंजिनिअर सुनील पोरे यांचे बाबासाहेबांना अनोखे अभिवादन; ५० किमी सायकलिंगद्वारे जयंती साजरी

म्हसवड, वृत्तसेवा : भारतीय राज्यघटनेचे शिल्पकार महामानव डॉ. बाबासाहेब आंबेडकर यांच्या १३५ व्या जयंतीनिमित्त म्हसवड येथील सामाजिक कार्यकर्ते तथा शिंपी समाज सातारा जिल्हाध्यक्ष इंजिनिअर सुनील पोरे यांनी अनोख्या पद्धतीने अभिवादन करत समाजासमोर प्रेरणादायी उदाहरण निर्माण केले आहे.

इंजि. पोरे (वय ६३) यांनी मंगळवार, दि. १४ एप्रिल रोजी पहाटे ५ वाजता आपल्या घरापासून सायकलिंगला सुरुवात केली. सुमारे दीड तासात ५० किलोमीटरचा प्रवास करत ते सकाळी ६.३० वाजता गोंदवले बुद्रुक येथे पोहोचले. तेथे जयभीम युवक ऑर्गनायझेशन आयोजित कार्यक्रमात सहभागी होत त्यांनी डॉ. बाबासाहेब आंबेडकर यांच्या प्रतिमेस अभिवादन केले व त्यांच्या विचारांना वंदन केले.

यानंतर त्यांनी पुन्हा सकाळी ७ वाजता गोंदवलेहून म्हसवडकडे परतीचा प्रवास सुरू केला आणि सुमारे सव्वातासात, म्हणजेच सकाळी ८.३० वाजता ते म्हसवड येथे सुखरूप परतले. एकूण ५० किलोमीटर सायकलिंग करत त्यांनी जयंतीदिनी दिलेले हे अभिवादन सर्वांसाठी प्रेरणादायी ठरले आहे.

विशेष म्हणजे, इंजि. पोरे हे गेल्या १२ वर्षांपासून विविध धार्मिक व सामाजिक स्थळांपर्यंत सायकलिंग करण्याचा छंद सातत्याने जोपासत आहेत. दरवर्षी १४ एप्रिलला गोंदवले बुद्रुक, १० डिसेंबरला शिखर शिंगणापूर तसेच श्रावण महिन्यात पंढरपूर येथे सायकलिंग करून ते आपली सामाजिक व आध्यात्मिक बांधिलकी जपतात.

त्यांच्या या उपक्रमाचे बौद्ध बांधवांसह नागरिकांकडून मोठ्या प्रमाणात कौतुक होत असून, बाबासाहेबांच्या विचारांचे आचरण कृतीतून दाखवणारा हा उपक्रम असल्याची भावना व्यक्त केली जात आहे.