बीड शहराचा ‘स्वच्छता पॅटर्न’ आता हायटेक!

बीड शहराचा ‘स्वच्छता पॅटर्न’ आता हायटेक! घंटागाड्यांवर GPS ची नजर; सभापती शेख निजाम यांची आधुनिक झेप

​बीड | प्रतिनिधी
बीड शहराच्या स्वच्छतेचा प्रश्न मार्गी लावण्यासाठी आणि कचरा संकलन प्रक्रियेत पारदर्शकता आणण्यासाठी बीड नगरपालिकेने एक क्रांतिकारी पाऊल उचलले आहे. स्वच्छता सभापती शेख निजाम आणि मुख्याधिकारी शैलेश फडसे यांच्या संकल्पनेतून शहरातील सर्व घंटागाड्या व स्वच्छता संबंधित वाहनांवर आता अत्याधुनिक GPS (Global Positioning System) प्रणाली कार्यान्वित करण्यात आली आहे. या आधुनिक तंत्रज्ञानामुळे बीड नगरपालिका आता स्वच्छतेच्या बाबतीत ‘स्मार्ट’ झाली आहे.
​शहराची वाढती लोकसंख्या आणि कचरा व्यवस्थापनातील आव्हाने पाहता, पारंपरिक पद्धतींमध्ये अनेक मर्यादा येत होत्या. कामातील अनियमितता आणि घंटागाड्या वेळेवर न येण्याच्या तक्रारींना पूर्णविराम देण्यासाठी सभापती शेख निजाम यांनी या तंत्रज्ञानाचा आग्रह धरला होता. या प्रणालीमुळे आता प्रत्येक घंटागाडीची हालचाल, तिने कापलेले अंतर आणि कामाचे वेळापत्रक यावर नगरपालिकेच्या नियंत्रण कक्षातून थेट वॉच ठेवला जाणार आहे. यामुळे कोणते वाहन कोणत्या प्रभागात किती वेळ थांबले आणि कचरा संकलन पूर्ण झाले की नाही, याची ‘रिअल-टाइम’ माहिती प्रशासनाला मिळणार आहे.
​या उपक्रमाबाबत माहिती देताना स्वच्छता सभापती शेख निजाम म्हणाले की, “नागरिकांना दर्जेदार आणि वेळेवर सेवा देणे हे आमचे प्राथमिक कर्तव्य आहे. अनेकदा गाडी वेळेवर न आल्याच्या तक्रारी प्राप्त होत होत्या, मात्र आता GPS मुळे कामात शिस्त आणि पारदर्शकता येईल. यामुळे केवळ कचरा संकलन सुधारणार नाही, तर डिझेल चोरी आणि कामातील गैरप्रकारांनाही आळा बसेल. लवकरच या प्रणालीचे प्रत्यक्ष प्रात्यक्षिक शहरवासीयांना दाखवले जाईल.”
​हा संपूर्ण प्रकल्प पालकमंत्री सुनेत्राताई अजित पवार आणि आमदार विजयसिंहराजे पंडित यांच्या मार्गदर्शनाखाली राबवला जात आहे. यासाठी नगराध्यक्ष प्रेमलताताई पारवे, उपाध्यक्ष विनोद मुळूक, शेख मुजीबभाई, सभापती बाळासाहेब गुंजाळ, संजय उडाण, जकी सौदागर आणि गटनेता फारूक पटेल यांचे मोलाचे सहकार्य लाभले आहे.
​या नवीन प्रणालीच्या अंमलबजावणीवेळी स्वच्छता निरीक्षक भागवत जाधव, मुकादम आणि सर्व चालक उपस्थित होते. बीड नगरपालिकेने घेतलेल्या या धाडसी निर्णयामुळे शहराच्या सौंदर्यीकरणात आणि आरोग्यात मोठी सुधारणा होईल, असा विश्वास व्यक्त केला जात आहे. आधुनिक तंत्रज्ञानाचा वापर करून शहर कचरामुक्त करण्याच्या या प्रयत्नांचे बीडमधील नागरिकांकडून मोठ्या प्रमाणावर स्वागत होत आहे.